ദൈവമേ എത്രയാഗാധമഹോ നിൻ ദിവ്യ വിചാരണകൾ -ഓർക്കിൽ
എവ്വിധമതിലെ ദിവ്യ രഹസ്യങ്ങൾ ചൊവ്വോടറിഞ്ഞിടുന്നു

വാനവും ഭൂമിയുമാഴവുമൊരുപോൽ വാണരുന്നു സദാ- മഹാ
ജ്ഞാനമോടവയെ നിൻ മഹത്വത്തിന്നായ് നീ നടത്തീടുന്നഹോ!

നിൻ പ്രിയ മക്കടെ നന്മയിലേക്കായ് അമ്പിയലും പരനേ-എല്ലാം
ഇമ്പമോടൊന്നായ് വ്യാപരിച്ചീടുന്നു തുമ്പമവർക്കു വൃഥാ

മൊട്ടിനു കൈയ്പ്പു രുചിക്കിലുമായതു പൊട്ടി വിടർന്നിടുമ്പോൾ -അതു
കാട്ടുമതിൻ മധുരാകൃതിയും തേൻ കട്ടയുമുണ്ടകമേ

ശിക്ഷയിലും ബഹു കഷ്ടത തന്നിലും അക്ഷയനാം പരനേ-നിന്റെ
രക്ഷയിൻ മാമധുരം രുചിക്കാമതു നിശ്ചയമീയെനിക്ക്

എന്തിനു പൊന്തി വരുന്നൊരു കാറിനാൽ ചിന്ത തളർന്നിടുന്നു-വരം
ചിന്തിടുമാറതു പൂർണ്ണമതോർത്താൽ സന്തോഷമേയെനിക്കു

എത്ര കരുത്തൊരിരുട്ടിലുമീ ഞാൻ കർത്തനേ നിൻ വലങ്കൈ -കണ്ടെൻ
അത്തലടക്കി മനോസുഖമെപ്പോഴും എത്തിടാമേ പരനേ

മന്നനേ നിന്നുടെ വൻ ക്രിയയെ ഞാൻ ഒന്നിനെ കണ്ടുടനെ-മഹാ
മന്ദനായ് വിധിചെയ്‌വാതിരിപ്പാനായ് തന്നിടേണം കൃപയെ